يا طرابلس قوليله
السلام علــيكم
(...يا طرابلس قوليله...)
''يا طرابلس قوليله''
انتي العاصمه ما عندنا تبديله ليبيا واحده يا طرابلس قوليله
يا عروس بحرنا انتي العاصمه انريدوك ما غيّرنا علي حكم طاغي هكذي صغّرنا كمل نفطنا وانتي حذاه هزيله
لو كان زدنا عام راه كفرنا ولفظة آله الشعب راحت عطيله
حتي بالعزا مسّع جبر خاطرنا ورد الكفَي ناويلنا تقتيله
وهازي علينا وين حس خطرنا شحات رمز كارس ما معاه قبيله
ونحنا بالدموع وبالقلوب سهرنا الله يفرحك كي ما فرحنا الليله
ومعاك في الجوامع وين ما كبّرنا دعينا الله يخلصك من ويله
''يا طرابلس قوليله''
يا طرابلس يا درّه انتي العاصمه انريدوك تبقي حرّه من حكم طاغي يخلصك من شرّه الله القوي العزيز غير ادعيله
اما يمتسك باليد ياخذ كرّه في وسط الشوارع يضربوه العويله
والا طائره يركب ويهرب برّا كيف بن علي غير هيت من يوميله
يا عاصمة دولتنا ليبيا واحده ما نفرقوا كلمتنا ينصرنا الله ونرفعوا رايتنا فوق سماك الزاهيه الجميله
قولي لبو قرجوطه علي شعبنا ماعاد يرفع صوته سوريته علينا باينه مشروطه ويهدّر وغير عياط ماله حيله
قوليله عليش يعارك ما تقول شي نظر لا بن علي لا مبارك تيار نار الشعب كله شارك نين يجرفه ماعاد يوقف سيله